श्रीगोंदा- श्रीगोंदा-जामखेड राष्ट्रीय महामार्गावर रविवारी दुपारी घडलेल्या भीषण अपघातात चौघे तरुण गंभीर जखमी झाले. भावडी शिवारात भरधाव कार नियंत्रण सुटल्याने रस्ता सोडून खाली गेली आणि अनेक पलट्या घेत उलटली. या धडकेत कारचा अक्षरशः चक्काचूर झाला असून, जखमींवर तातडीने उपचार सुरू आहेत.
भरधाव वेगामुळे अपघात
रविवारी साडेबारा वाजण्याच्या सुमारास, एमएच ०९ डीएक्स ५१३५ या क्रमांकाची कार श्रीगोंद्याच्या दिशेने जात असताना भावडी शिवारात अपघात झाला. प्रत्यक्षदर्शींच्या म्हणण्यानुसार, अचानक कारचा तोल गेल्याने ती महामार्गावरून खाली घसरली आणि भरधाव वेगामुळे दूरवर फेकली जाऊन उलटली.
अपघातात चार जण जखमी
या अपघातात हर्षद अनुभुले, नीलेश साळुंखे, प्रथमेश साळुंखे आणि ओम चव्हाण (रा. चोराची वाडी) हे चौघेही गंभीर जखमी झाले. धक्क्याच्या जोरात कारमधील सर्वजण बाहेर फेकले गेले. अपघातानंतर भावडीचे माजी सरपंच श्रीकांत भोस, विशाल भोस, शुभम भोस, अशोक भोस, प्रवीण भोस आणि अन्य नागरिकांनी तत्परतेने मदत करून जखमींना रुग्णालयात हलविले. सध्या त्यांच्यावर श्रीगोंदा व दौंड येथील खासगी रुग्णालयांत उपचार सुरू आहेत.
अपघाताचे कारण
रस्त्याच्या सिमेंट काँक्रीटीकरणामुळे महामार्गाचा दर्जा सुधारला असला तरी, चालकांकडून वाहतूक नियमांकडे दुर्लक्ष होत असल्याचे स्पष्ट दिसते. अपघाताच्या वेळी कारचा वेग अत्यंत जास्त होता, त्यामुळे नियंत्रण सुटून ती अनेक वेळा पलटली. वेग आणि निष्काळजीपणामुळे अशा अपघातांची संख्या वाढत असल्याची स्थानिकांची प्रतिक्रिया आहे.
