गणेशवाडी परिसरात घडलेल्या महिलेवरील हल्ला आणि अत्याचाराच्या प्रयत्नाच्या गंभीर प्रकरणात नेवासा येथील अतिरिक्त जिल्हा सत्र न्यायालयाने आरोपीला दोषी ठरवत पाच वर्षे सश्रम कारावासाची शिक्षा सुनावली आहे. चाकूने वार करून महिलेला जखमी करणे, तिला धमकावणे आणि दागिने लुटल्याच्या आरोपांवरून चाललेल्या या खटल्यात न्यायालयाने साक्षी व पुराव्यांच्या आधारे निर्णय दिला.
ओळखीचा फायदा घेत महिलेला बोलावले
या प्रकरणातील पीडित 28 वर्षीय महिला आणि आरोपी बाबासाहेब क्षिरसागर हे एकमेकांच्या परिचयातील होते. 24 जून 2024 रोजी महिला तिच्या माहेरी असताना आरोपीने तिला खोटे कारण सांगून फत्तेपूर येथील बस स्थानकावर बोलावून घेतले. त्यानंतर तिला बळजबरीने आडबाजूच्या ठिकाणी नेण्यात आल्याचे फिर्यादीत नमूद करण्यात आले होते.
प्रतिकार करताच चाकूने वार
आरोपीने महिलेवर लैंगिक अत्याचार करण्याचा प्रयत्न केला. महिलेने प्रतिकार केल्यानंतर आरोपीने तिच्या मानेवर चाकूने वार करून तिला जखमी केले. याचवेळी आरोपीने तिच्या अंगावरील सोन्याचे दागिने लुटल्याचा आरोपही करण्यात आला होता. घटनेनंतर आरोपीने महिलेला धमकी देत, हा प्रकार कुणाला सांगितल्यास जिवे मारण्याची धमकी दिल्याचे फिर्यादीत म्हटले होते.
शनीशिंगणापूर पोलीस ठाण्यात गुन्हा
या घटनेनंतर शनीशिंगणापूर पोलीस ठाण्यात भारतीय दंड विधानातील संबंधित कलमांनुसार गुन्हा दाखल करण्यात आला. तत्कालीन पोलीस निरीक्षक खगेंद्र टेभेंकर यांनी या प्रकरणाचा तपास तातडीने हाती घेतला. आरोपीला अटक करून तपास पूर्ण करण्यात आला आणि नेवासा येथील जिल्हा न्यायालयात दोषारोपपत्र दाखल करण्यात आले.
न्यायालयात सहा साक्षीदार तपासले
खटल्याच्या सुनावणीदरम्यान सरकारी पक्षातर्फे एकूण सहा साक्षीदार तपासण्यात आले. यामध्ये पीडित महिला, वैद्यकीय अधिकारी आणि तपास अधिकारी यांच्या साक्षी महत्त्वाच्या ठरल्या. वैद्यकीय पुरावे, पीडितेची साक्ष आणि तपासातील निष्कर्ष यांचा विचार करून न्यायालयाने आरोपीविरोधातील गुन्हा सिद्ध झाल्याचे मान्य केले.
आरोपीला पाच वर्षे सश्रम कारावास
नेवासा येथील अतिरिक्त जिल्हा सत्र न्यायालयाने आरोपी बाबासाहेब क्षिरसागर याला भारतीय दंड विधान कलम 307 अंतर्गत दोषी ठरवले. न्यायालयाने आरोपीला पाच वर्षे सश्रम कारावास आणि दंडाची शिक्षा सुनावली. या खटल्यात सरकारी पक्षातर्फे विष्णुदास भोर्डे यांनी युक्तिवाद केला, तर महिला पोलीस कर्मचारी स्वाती तडुलकर यांनी त्यांना सहकार्य केले.
