जामखेड- नगरपरिषदेच्या आगामी सार्वत्रिक निवडणुकीची दिशा आता स्पष्ट झाली आहे. २०२५ ते २०३० या कार्यकाळासाठी नगरपरिषदेची प्रारूप प्रभाग रचना मुख्याधिकारी अजय साळवे यांनी जाहीर केली असून, या रचनेवर नागरिकांना आपले हरकती व सूचना नोंदविण्याची संधी देण्यात आली आहे.
१२ प्रभागातून २४ नगरसेवकांची निवड
नवीन रचनेनुसार जामखेड नगरपरिषदेच्या १२ प्रभागांतून एकूण २४ नगरसेवकांची निवड होणार आहे. नगराध्यक्षाची निवड थेट जनतेतून केली जाणार असल्याने निवडणूक प्रक्रियेला अधिक उत्साह आणि थेट सहभाग लाभणार आहे. यामुळे नगरपरिषदेतील लोकप्रतिनिधित्व अधिक व्यापक होणार आहे.
हरकती व सूचनांसाठी अंतिम मुदत
३१ ऑगस्टपर्यंत नागरिकांना आपल्या हरकती आणि सूचना नगरपरिषदेच्या मुख्याधिकाऱ्यांकडे सादर करता येतील. यानंतर, १ सप्टेंबर ते ८ सप्टेंबरदरम्यान जिल्हाधिकाऱ्यांनी नेमलेल्या प्राधिकृत अधिकाऱ्यांमार्फत सुनावण्या घेतल्या जातील. या सुनावण्यांमध्ये भौगोलिक सीमांबाबत आलेल्या तक्रारी आणि सूचनांचा बारकाईने विचार होईल.
अंतिम प्रभाग रचना ठरविण्याची प्रक्रिया
९ ते ११ सप्टेंबरदरम्यान प्राप्त हरकतींचा आढावा घेऊन प्राधिकृत अधिकारी अंतिम प्रभाग रचना निश्चित करतील. त्यानंतर ही रचना जिल्हाधिकारी नगरविकास विभागास पाठवतील. पुढे १२ ते १८ सप्टेंबरदरम्यान नगरविकास विभाग अंतिम प्रस्ताव राज्य निवडणूक आयोगाकडे सादर करेल. अखेरीस २६ ते ३० सप्टेंबरदरम्यान राज्य निवडणूक आयोग अधिसूचनेद्वारे अंतिम प्रभाग रचना घोषित करणार आहे.
महिला आरक्षणामुळे वाढणार स्पर्धा
१० जुलै २०२५ रोजी जारी आदेशानुसार जामखेड नगरपरिषदेतील नगरसेवकांची एकूण संख्या २४ असेल. त्यापैकी अर्ध्या म्हणजे १२ जागा महिलांसाठी राखीव असतील. या निर्णयामुळे महिला उमेदवारांना मोठ्या प्रमाणात संधी उपलब्ध झाली असून, राजकीय पटलावर त्यांचा प्रभाव वाढण्याची शक्यता आहे.
इच्छुक उमेदवारांची तयारी सुरू
नगरपरिषद निवडणूक काही काळ रखडल्याने अनेक इच्छुक उमेदवार नाराज झाले होते. मात्र आता प्रारूप प्रभाग रचना जाहीर झाल्याने राजकीय वातावरण पुन्हा रंगात आले आहे. इच्छुक उमेदवार जनतेच्या संपर्कात राहण्यासाठी वेगवेगळ्या सामाजिक, धार्मिक आणि सांस्कृतिक कार्यक्रमांमध्ये सक्रिय दिसू लागले आहेत. अनेकांनी प्रचारासाठी आपली रणनीती आखण्यास सुरुवात केली असून, आगामी निवडणुकीत चुरस अधिक रंगणार असल्याचे स्पष्ट होत आहे.
