अहिल्यानगर शहरातील सावेडी उपनगरात घरफोडीची घटना घडली असून अज्ञात चोरट्यांनी बंद घराचे कुलूप तोडून मोठ्या प्रमाणात रोख रक्कम आणि दागिने चोरून नेल्याचे समोर आले आहे. या चोरीत सुमारे दोन लाख 95 हजार रुपयांचा ऐवज लंपास करण्यात आला आहे. ही घटना सावेडी परिसरातील तांबटकर मळा, ममता गॅस जवळ 1 ते 3 मार्च दरम्यान घडल्याची माहिती पोलिसांकडून मिळाली आहे.
घर बंद असल्याची संधी साधून चोरी
या प्रकरणी गोविंद बलराज बेहेल (वय 62) यांनी तोफखाना पोलीस ठाण्यात तक्रार दाखल केली आहे. बेहेल हे सावेडीतील ममता गॅस जवळील भाड्याच्या घरात वास्तव्यास आहेत. ते 30 जानेवारी 2026 रोजी वैद्यकीय उपचारासाठी पुणे येथे गेले होते. त्यानंतर काही दिवसांनी ते नाशिक येथे मुलीकडे गेले होते. त्यामुळे त्यांचे घर काही काळासाठी पूर्णपणे बंद होते. याच परिस्थितीचा फायदा घेत अज्ञात चोरट्यांनी घरावर डल्ला मारल्याचे समोर आले आहे.
कडी-कोंडा तोडून घरात प्रवेश
चोरट्यांनी घराच्या दरवाजावरील कडी-कोंडा तोडून घरात प्रवेश केल्याचे प्राथमिक तपासात दिसून आले आहे. घरात प्रवेश केल्यानंतर त्यांनी कपाटे आणि इतर वस्तूंची झडती घेतली. या दरम्यान घरात ठेवलेली सुमारे 80 हजार रुपयांची रोख रक्कम चोरट्यांच्या हाती लागली. त्यासोबतच सोन्याच्या अंगठ्या, मंगळसूत्र, कर्णफुले असे सुमारे पाच तोळे वजनाचे सोन्याचे दागिने तसेच चांदीचे विविध दागिने आणि इतर मौल्यवान वस्तू चोरून नेण्यात आल्या. या सर्व वस्तूंची एकूण किंमत सुमारे दोन लाख 95 हजार रुपये असल्याचे फिर्यादीत नमूद करण्यात आले आहे.
घराची देखभाल करणाऱ्या महिलेला चोरीचा संशय
घराची देखभाल करणाऱ्या एका महिलेला दरवाज्याचे कुलूप तोडलेले असल्याचे दिसून आले. यानंतर तिने तातडीने ही माहिती संबंधितांना दिली. या घटनेची माहिती मिळाल्यानंतर गोविंद बेहेल यांनी आपल्या नातेवाईकांना संपर्क साधत घटनास्थळी बोलावून घेतले. त्यानंतर पोलिसांनाही घटनेची माहिती देण्यात आली.
पोलिसांकडून घटनास्थळाची पाहणी
माहिती मिळताच तोफखाना पोलीस घटनास्थळी दाखल झाले. पोलिसांनी ठसे तज्ज्ञांच्या मदतीने घटनास्थळाची तपासणी केली. घरफोडी कशी घडली आणि चोरट्यांनी कोणत्या मार्गाने प्रवेश केला याबाबत तपास सुरू करण्यात आला आहे. अज्ञात चोरट्यांविरोधात घरफोडीचा गुन्हा नोंदविण्यात आला असून पोलिसांनी आरोपींचा शोध घेण्यासाठी तपासाची चक्रे फिरवली आहेत.
परिसरात भीतीचे वातावरण
सावेडी उपनगरात घडलेल्या या घरफोडीच्या घटनेमुळे स्थानिक रहिवाशांमध्ये चिंता निर्माण झाली आहे. बंद घरांवर चोरट्यांची नजर असल्याची चर्चा परिसरात सुरू असून पोलिसांकडून या घटनेचा तपास पुढे सुरू आहे.
