आजच्या डिजिटल युगात घर, ऑफिस किंवा स्टार्टअपसाठी विश्वासार्ह आणि वेगवान संगणक असणे अत्यंत गरजेचे झाले आहे. या वाढत्या गरजांचा विचार करून तैवानमधील प्रसिद्ध टेक कंपनी ASUS ने भारतात आपल्या ग्राहकांसाठी दोन नवीन पीसी सिरीज बाजारात आणल्या आहेत. कंपनीने ASUS V501 डेस्कटॉप आणि ASUS AiO V400 सिरीज लाँच करत आपला पीसी पोर्टफोलिओ अधिक मजबूत केला आहे. कार्यक्षमता, आकर्षक डिझाइन आणि जागेचा योग्य वापर या तिन्ही बाबींचे संतुलन साधणारी ही उपकरणे विशेषतः घरगुती वापरकर्ते, लहान कार्यालये, स्टार्टअप्स आणि क्रिएटिव्ह स्टुडिओ यांच्यासाठी तयार करण्यात आली आहेत. ASUS V501 डेस्कटॉपची सुरुवातीची किंमत ₹42,990 ठेवण्यात आली आहे.
ASUS V501 डेस्कटॉपचे दोन प्रकार
ASUS ने V501 डेस्कटॉप दोन वेगवेगळ्या मॉडेलमध्ये सादर केला आहे, ज्यामुळे वापरकर्त्यांना त्यांच्या गरजेनुसार पर्याय निवडता येईल. पहिला प्रकार V501MV मिनी टॉवर असून त्यात 15-लिटर क्षमतेचे चेसिस दिले आहे. दुसरा प्रकार V501SV स्मॉल फॉर्म फॅक्टर आहे, ज्यात अधिक कॉम्पॅक्ट 9-लिटर चेसिस वापरण्यात आले आहे. हे डेस्कटॉप विशेषतः SOHO (Small Office Home Office), स्टार्टअप्स, लघु उद्योग आणि सर्जनशील स्टुडिओ यांसाठी डिझाइन करण्यात आले आहेत. दस्तऐवज तयार करणे, अकाउंटिंग, ऑनलाइन मीटिंग्ज, हलकी ग्राफिक कामे आणि दैनंदिन कार्यालयीन कामे सहजतेने करण्यासाठी हे सिस्टम उपयुक्त ठरतात.
उच्च कार्यक्षमता आणि आधुनिक हार्डवेअर
या नवीन सिरीजमध्ये वापरकर्त्यांना आधुनिक हार्डवेअरची साथ मिळते. यात Intel Core 7 240H प्रोसेसरचा पर्याय उपलब्ध असून तो वेगवान आणि स्थिर परफॉर्मन्स देण्यासाठी सक्षम आहे. याशिवाय या पीसीमध्ये 64GB पर्यंत DDR5 RAM विस्तार करण्याची सुविधा आहे. त्यामुळे मल्टीटास्किंग करताना किंवा एकाच वेळी अनेक अॅप्स वापरताना प्रणाली अधिक स्मूथ आणि स्थिर राहते. नियमित ऑफिस कामे, ब्राउझिंग, व्हिडिओ कॉन्फरन्सिंग आणि हलके क्रिएटिव्ह काम यासाठी हा कॉन्फिगरेशन पुरेसा दमदार मानला जातो.
ASUS AiO V400 सिरीज – कमी जागेत संपूर्ण पीसी
ASUS ने याचबरोबर AiO (All-in-One) V400 सिरीज देखील सादर केली आहे. या सिरीजमध्ये V440 आणि V470 हे दोन ऑल-इन-वन पीसी समाविष्ट आहेत. या प्रकारात मॉनिटर आणि CPU एकाच युनिटमध्ये एकत्र असतात, त्यामुळे वेगळे कॅबिनेट किंवा जास्त केबल्सची गरज राहत नाही. लहान घरांमध्ये किंवा मर्यादित जागेच्या ऑफिसमध्ये हा डिझाइन खूपच सोयीचा ठरतो. हे सिस्टम स्ट्रीमिंग, इंटरनेट ब्राउझिंग, ऑनलाइन क्लासेस, व्हिडिओ कॉलिंग आणि दैनंदिन मल्टीटास्किंगसाठी योग्य मानले जातात.
किंमत आणि फायनान्सिंग पर्याय
किंमतीबाबत बोलायचे झाल्यास ASUS V470 AiO ची किंमत ₹71,990 ठेवण्यात आली आहे, तर ASUS V440 AiO ₹67,990 मध्ये उपलब्ध होईल. कंपनीने ग्राहकांसाठी सोपे फायनान्सिंग पर्यायही उपलब्ध करून दिले आहेत. ASUS V501 डेस्कटॉपसाठी EMI ₹3,583 प्रति महिना पासून सुरू होते, तर V470 AiO साठी EMI ₹4,799 प्रति महिना पासून उपलब्ध आहे. याशिवाय ASUS अधिकृत रिटेल स्टोअर्समध्ये निवडक बँकांच्या क्रेडिट कार्ड EMI व्यवहारांवर ₹2,000 पर्यंत कॅशबॅकची सुविधा देखील देत आहे.
भारतातील उपलब्धता
उपलब्धतेच्या बाबतीत कंपनीने वेगवेगळ्या तारखा जाहीर केल्या आहेत. ASUS V501SV डेस्कटॉप 5 मार्चपासून विक्रीसाठी उपलब्ध होईल. V501MV मिनी टॉवर 16 मार्चपासून ASUS ई-शॉपवर आणि 25 मार्चपासून इतर विक्री चॅनेलवर मिळेल. ASUS V470 AiO सध्या बाजारात उपलब्ध आहे, तर V440 AiO 14 एप्रिलपासून विक्रीसाठी येणार आहे. ही सर्व उत्पादने ASUS एक्सक्लुझिव्ह स्टोअर्स, ASUS ई-शॉप, Flipkart, Amazon, Croma आणि अधिकृत रिटेल पार्टनर्समार्फत खरेदी करता येतील.
