शहरात सकाळच्या वेळेत कचरा संकलनाचे काम करत असल्याचा आडोसा घेऊन घरफोडी करणाऱ्या एका महिलेला स्थानिक गुन्हे शाखेने ताब्यात घेतले आहे. तिच्याकडून दोन स्वतंत्र घरफोडीचे गुन्हे उघडकीस आले असून रोख रक्कम आणि पितळी भांडी असा एकूण २८ हजार १०० रुपयांचा मुद्देमाल जप्त करण्यात आला आहे.
बंद घरावर नजर, कुलूप तोडून प्रवेश
१९ फेब्रुवारी रोजी सकाळी ११.३० ते २० फेब्रुवारी रोजी सकाळी १०.३० या कालावधीत नवीपेठ परिसरातील आनंद रतीलाल मुथा यांच्या निवासस्थानी घरफोडीची घटना घडली. अज्ञात व्यक्तीने घराचा कडीकोयंडा व कुलूप तोडून आत प्रवेश केला आणि कपाटातील लॉकर फोडून रोख रक्कम, चांदीच्या वस्तू तसेच पितळी भांडी असा सुमारे ७३ हजार रुपयांचा ऐवज चोरून नेला.
या प्रकरणी कोतवाली पोलीस ठाण्यात गुन्हा दाखल करण्यात आला होता. शहरातील प्रलंबित घरफोडी प्रकरणे तातडीने उघडकीस आणण्याचे निर्देश वरिष्ठ स्तरावरून देण्यात आल्यानंतर तपासाला वेग देण्यात आला.
विशेष पथकाची स्थापना
पोलीस निरीक्षक किरणकुमार कबाडी यांच्या मार्गदर्शनाखाली विशेष पथक स्थापन करण्यात आले. उपनिरीक्षक अनंत सालगुडे यांच्यासह पोलीस अंमलदार सुनील पवार, शाहीद शेख, गणेश धोत्रे, फुरकान शेख तसेच महिला पोलीस अंमलदार भाग्यश्री भिटे आणि ज्योती शिंदे यांचा या पथकात समावेश होता.
पथकाने घटनास्थळी भेट देऊन तांत्रिक तपास, सीसीटीव्ही फुटेजचे विश्लेषण आणि गोपनीय माहितीच्या आधारे संशयितांचा शोध सुरू केला.
कचरा संकलनाच्या आडून गुन्हेगारी
२६ फेब्रुवारी रोजी मिळालेल्या माहितीनुसार सकाळी कचरा गोळा करणारी सविता अर्जुन कुचेकर (वय ४२, रा. नालेगाव) हिच्यावर संशय व्यक्त करण्यात आला. पथकाने तत्काळ तिच्या निवासस्थानी जाऊन तिला ताब्यात घेतले.
प्राथमिक चौकशीदरम्यान तिने घरफोडी केल्याची कबुली दिली. पुढील तपासात अशाच प्रकारे आणखी एका घरात चोरी केल्याचे उघड झाले असून कोतवाली पोलीस ठाण्यातील आणखी एक गुन्हा उकलण्यात आला आहे.
मुद्देमाल जप्त
तपासादरम्यान तिच्याकडून रोख रक्कम आणि पितळी भांडी असा एकूण २८ हजार १०० रुपयांचा मुद्देमाल जप्त करण्यात आला आहे. पोलिसांकडून पुढील तपास सुरू असून शहरातील इतर प्रलंबित घरफोड्यांशी या घटनेचा संबंध आहे का, याचीही चौकशी करण्यात येत आहे.
