श्रीगोंदा – चांडगाव येथे भैरवनाथ महाराजांच्या यात्रेच्या तयारी दरम्यान घर स्वच्छ करताना विजेचा धक्का बसून राजेंद्र लोंढे (वय ४९) आणि त्यांच्या आई सखुबाई हिरामण लोंढे (वय ६५) यांचा दुर्दैवी मृत्यू झाला. ही हृदयद्रावक घटना आज (२२ एप्रिल २०२५) सकाळी सातच्या सुमारास घडली. गावातील उत्सवाच्या आनंदावर या घटनेने शोककळा पसरली असून, संपूर्ण गाव हादरून गेले आहे. श्रीगोंदा पोलिसांनी घटनास्थळी पंचनामा सुरू केला असून, मृतदेह शवविच्छेदनासाठी ग्रामीण रुग्णालयात पाठवण्यात आले आहेत.
दोघांचा जागीच मृत्यू
चांडगावात सध्या भैरवनाथ महाराजांचा वार्षिक यात्रोत्सव सुरू आहे. या उत्सवासाठी गावात पाहुण्यांची ये-जा वाढली आहे. राजेंद्र लोंढे आणि त्यांच्या मातोश्री सखुबाई लोंढे हे यात्रेच्या तयारीसाठी घर पाण्याने स्वच्छ करत होते. घराच्या मुख्य लोखंडी दरवाजापासून वीजजोड वायर मीटरपर्यंत जोडण्यात आली होती.
ही वायर लोखंडी दरवाजाला घासून खराब झाली होती, ज्यामुळे तिच्यातील वीजप्रवाह पाण्यात उतरला. याचवेळी राजेंद्र यांना विजेचा जोरदार धक्का बसला, आणि त्यांनी मदतीसाठी आईला हाक मारली. सखुबाई यांनी धाव घेतली, परंतु त्यांनाही विजेचा धक्का बसला, आणि दोघांचा जागीच मृत्यू झाला.
घटनेचा पंचनामा
ही घटना राजेंद्र यांचे बंधू घरी परतल्यानंतर उघडकीस आली. त्यांनी तातडीने गावकऱ्यांना आणि पोलिसांना माहिती दिली. श्रीगोंदा पोलिसांनी तात्काळ घटनास्थळी धाव घेत पंचनामा सुरू केला. दोघांचे मृतदेह शवविच्छेदनासाठी श्रीगोंदा येथील ग्रामीण रुग्णालयात पाठवण्यात आले. पोलिसांनी प्राथमिक तपासात वायरच्या खराब अवस्थेमुळे ही दुर्घटना घडल्याचे नमूद केले आहे. महावितरणाच्या अधिकाऱ्यांनाही याबाबत माहिती देण्यात आली असून, वीजपुरवठा व्यवस्थेची तपासणी केली जाणार आहे.
गावावर शोककळा
भैरवनाथ महाराजांच्या यात्रेनिमित्त गावात उत्साहाचे वातावरण होते, परंतु या घटनेने सर्वत्र शोक पसरला आहे. माय-लेकराच्या अकाली मृत्यूमुळे गावकऱ्यांमध्ये हळहळ व्यक्त होत आहे. यात्रेच्या आनंदावर या दुर्घटनेने विरजण पडले असून, अनेकांनी उत्सवातील सहभाग कमी केला आहे. गावकऱ्यांनी वीजपुरवठा व्यवस्थेतील त्रुटींवर प्रश्न उपस्थित केले असून, भविष्यात अशा घटना टाळण्यासाठी कठोर उपाययोजनांची मागणी केली आहे.
