संगमनेर- संत परंपरेतील विचारांचा अवमान करणारी आणि समाजसुधारकांना लक्ष्य करणारी धर्मांध वृत्ती आजही कार्यरत आहे. अशा प्रवृत्तींचा वेळीच समाचार घेण्याची गरज आहे, असे ठाम मत माजी मंत्री बाळासाहेब थोरात यांनी व्यक्त केले. गोरगरीब आणि सर्वसामान्य जनतेच्या अधिकारांचे रक्षण केवळ भारतीय राज्यघटना करत असून, या संविधानावर होणाऱ्या आघातांविरोधात समाजाने एकत्र येऊन लढा द्यावा, असे आवाहन त्यांनी केले.
अण्णा भाऊ साठेंना भारतरत्न देण्याची मागणी
लोकशाहीर अण्णा भाऊ साठे यांच्या बहुमूल्य साहित्यिक व सामाजिक योगदानाची दखल घेत त्यांना भारतरत्न पुरस्काराने गौरवावे, अशी मागणीही थोरात यांनी यावेळी केली. अण्णा भाऊ साठे हे श्रमिक, दलित आणि वंचित समाजाच्या भावना व्यक्त करणारे प्रभावी लेखक आणि क्रांतिकारक होते. त्यांच्या विचारांचा प्रसार आणि सन्मान राष्ट्रीय पातळीवर व्हायला हवा, असेही ते म्हणाले.
सामाजिक समतेचा संदेश देणारे आंदोलन
संगमनेर बसस्थानकासमोर ‘मातंग एकता आंदोलन’ व सकल मातंग समाजाच्या वतीने १ ऑगस्ट रोजी अण्णा भाऊ साठे यांची १०५वी जयंती आणि लोकमान्य टिळक यांच्या पुण्यतिथीच्या निमित्ताने अभिवादन कार्यक्रमाचे आयोजन करण्यात आले. यावेळी थोरात यांच्यासह माजी आमदार डॉ. सुधीर तांबे, जिल्हाध्यक्ष ज्ञानेश्वर राक्षे, विश्वास मुर्तडक, अमर कातारी, प्रा. बाबा खरात, राजेंद्र आव्हाड यांच्यासह अनेक सामाजिक कार्यकर्ते मंचावर उपस्थित होते.
मुंबईच्या भवितव्याबाबत चिंता व्यक्त
मुंबई ही हुतात्म्यांच्या त्यागातून मिळवलेली आहे, परंतु सध्या अनेक उद्योग राज्याबाहेर जात असल्यामुळे मुंबईच्या भवितव्याबाबत प्रश्नचिन्ह निर्माण झाले आहे, अशी चिंता बाळासाहेब थोरात यांनी व्यक्त केली. महाराष्ट्राचे आर्थिक आणि औद्योगिक नेतृत्व अबाधित राहण्यासाठी सर्वांनी एकत्रित प्रयत्न करण्याची गरज त्यांनी अधोरेखित केली.
समाज परिवर्तनासाठी चळवळीची गरज
संत ज्ञानेश्वर, संत तुकाराम यांच्यापासून अण्णा भाऊ साठे, डॉ. बाबासाहेब आंबेडकर यांच्यापर्यंतच्या विचारधारेला नष्ट करण्याचा प्रयत्न करणाऱ्या शक्तींना रोखण्यासाठी सर्वांनी सजग राहणे आणि चळवळीच्या माध्यमातून विरोध दर्शवणे आवश्यक आहे. थोरात यांच्या या भाषणाने उपस्थितांमध्ये नवचैतन्य निर्माण केले.
