राहुरी : संशयित अवैध मुरूम वाहतुकीवर कारवाई करण्यासाठी डंपर अडवणारे परिविक्षाधीन प्रांताधिकारी विनीत शिर्के यांना वाहनातून खाली ओढून पुढील चाकाखाली ढकलल्याचा प्रकार पिंपळगाव फुणगी शिवारात घडला. त्याचवेळी चालकाने अंगावर डंपर घालण्याचा प्रयत्न केल्याचा आरोपही त्यांच्या फिर्यादीत आहे. रस्त्याच्या कडेला उडी मारल्याने शिर्के बचावले. २७ ऑक्टोबर रोजी सायंकाळी घडलेल्या या घटनेप्रकरणी डंपरचालक, मालक आणि सहा अनोळखी व्यक्ती अशा आठ जणांविरुद्ध राहुरी पोलीस ठाण्यात गुन्हा दाखल करण्यात आला आहे.
वाळू लिलावाच्या दप्तर तपासणीनंतर परतताना अडवला डंपर
परिविक्षाधीन प्रांताधिकारी विनीत विक्रांत शिर्के (वय ३२) हे २७ ऑक्टोबर २०२६ रोजी सायंकाळी साडेसहाच्या सुमारास मालुंजा येथे गेले होते. प्रवरा नदीपात्रातील अधिकृत वाळू लिलावाशी संबंधित दप्तराची तपासणी करणे हा त्यांच्या दौऱ्याचा उद्देश होता.
तपासणी पूर्ण झाल्यानंतर ते लाख-जातप मार्गे चिंचोलीच्या दिशेने निघाले. पिंपळगाव फुणगी शिवारात त्यांना मुरूम वाहून नेणारा विनानंबरचा डंपर दिसला. वाहतूक अवैध असल्याच्या संशयावरून त्यांनी वाहन थांबवले. त्यानंतर शिर्के स्वतः डंपरमध्ये बसले आणि चालक धनराज चौधरी याला वाहन राहुरी तहसील कार्यालयात नेण्यास सांगितले.
दुचाकींवरून आलेल्या सहा जणांनी रोखले वाहन
फिर्यादीनुसार, डंपर काही अंतर पुढे गेल्यानंतर मोटारसायकलींवरून आलेल्या सहा अनोळखी व्यक्तींनी त्याचा पाठलाग केला. त्यांनी डंपरला ओव्हरटेक करून समोर मोटारसायकली आडव्या लावल्या आणि वाहन थांबवले.
यानंतर संबंधित व्यक्तींनी शिर्के यांना धक्काबुक्की करून डंपरमधून खाली ओढल्याचा आरोप आहे. त्यांना डंपरच्या पुढील चाकाखाली ढकलण्यात आले आणि त्याचवेळी चालकाने त्यांच्या अंगावर वाहन घालण्याचा प्रयत्न केला, असे शिर्के यांनी तक्रारीत म्हटले आहे.
रस्त्याच्या कडेला उडी मारून बचाव
डंपर अंगावर येण्याचा धोका लक्षात घेत शिर्के यांनी तातडीने रस्त्याच्या बाजूला उडी मारली. त्यामुळे ते बचावल्याचे फिर्यादीत नमूद आहे. त्यानंतर संबंधितांनी मुरूम भरलेला डंपर घेऊन घटनास्थळावरून पलायन केले.
शिर्के आणि त्यांचे वाहनचालक प्रवीण खरमाळे यांनी डंपरचा सुमारे २० किलोमीटर पाठलाग केला. मात्र, डंपर थांबवण्यात त्यांना यश आले नाही. संशयित वाहनासह पसार झाले.
डंपरचालक आणि मालकासह आठ जणांविरुद्ध नोंद
घटनेनंतर शिर्के यांनी राहुरी पोलीस ठाण्यात फिर्याद दिली. त्यावरून डंपरचालक धनराज चौधरी, डंपरमालक दीपक ऊर्फ प्रवीण बबन लाटे (रा. चिंचोली, ता. राहुरी) आणि सहा अनोळखी व्यक्तींविरुद्ध जिवे मारण्याच्या प्रयत्नासह विविध आरोपांखाली गुन्हा दाखल करण्यात आला आहे.
या प्रकरणाची नोंद गुन्हा रजिस्टर क्रमांक १२०२/२०२६ अन्वये करण्यात आली आहे. फिर्यादीच्या आधारे भारतीय न्याय संहितेतील कलम १०९(१), १३२, ११५(२), १८९(२), १९१(१), १९०, १९१(२), १९१(३), २८१ आणि १४२ नमूद करण्यात आली आहेत. पोलीस निरीक्षक रवींद्र देशमुख पुढील तपास करीत असून, पोलिसांकडून आरोपींचा शोध घेतला जात आहे.
