श्रीगोंदा : शेतातील वेड्या बाभळीची झाडे काढताना सुरू झालेला वाद जीवघेण्या हल्ल्यापर्यंत पोहोचल्याच्या प्रकरणात श्रीगोंदा येथील जिल्हा व अतिरिक्त सत्र न्यायालयाने चार जणांना दोषी ठरविले आहे. चौघांनाही प्रत्येकी सात वर्षे सक्तमजुरी आणि दंडाची शिक्षा सुनावण्यात आली. काष्टी येथील संतवाडी शिवारात १५ मे २०१७ रोजी हा प्रकार घडला होता. गुन्ह्यात वापरलेली तलवार लपवून पुरावा नष्ट केल्याप्रकरणी मुख्य आरोपी अशोक गोविंद पाचपुते याला स्वतंत्र शिक्षाही ठोठावण्यात आली आहे.
पाइपचे नुकसान होण्याच्या मुद्द्यावरून वाद
फिर्यादी अंकुश बापुराव खोरे (वय ६०, रा. काष्टी, ता. श्रीगोंदा) हे घटनेच्या दिवशी शेतात जेसीबीच्या मदतीने मशागत आणि वेड्या बाभळीची झाडे काढण्याचे काम करत होते. या कामामुळे आपल्या पाइपचे नुकसान होईल, असे सांगून आरोपींनी त्यांना विरोध केला. त्यातून दोन्ही बाजूंमध्ये वाद निर्माण झाला.
या वादादरम्यान आरोपींनी संगनमताने खोरे आणि साक्षीदारांना शिवीगाळ व दमदाटी करून लाथाबुक्क्यांनी मारहाण केल्याचे प्रकरण न्यायालयासमोर आले होते.
डोक्यावर तलवारीचा वार; बचाव करताना बोटालाही दुखापत
मारहाणीच्या वेळी अशोक गोविंद पाचपुते याने पांडुरंग अंकुश खोरे यांच्या डोक्यावर तलवारीने वार केला. या हल्ल्यात ते गंभीर जखमी झाले. तलवारीचा वार अडविण्याचा प्रयत्न करताना त्यांच्या डाव्या हाताच्या बोटालाही गंभीर इजा झाली आणि फ्रॅक्चर झाले.
घटनेनंतर हल्ल्यासाठी वापरलेली तलवार लपवून पुरावा नष्ट करण्याचा प्रयत्न केल्याचा आरोपही अशोक पाचपुते याच्यावर होता. याप्रकरणी श्रीगोंदा पोलीस ठाण्यात गुन्हा नोंदविण्यात आला होता.
चौघांना कारावासासह दंड
न्यायालयाने अशोक गोविंद पाचपुते, नानासाहेब राजाराम पाचपुते, दीपक अशोक पाचपुते आणि दत्ता गोविंद पाचपुते यांना दोषी ठरवून प्रत्येकी सात वर्षे सक्तमजुरी व एक हजार रुपये दंड सुनावला. दंड न भरल्यास प्रत्येकी एक महिन्याचा अतिरिक्त सक्त कारावास भोगावा लागणार आहे.
याशिवाय चौघांनाही प्रत्येकी दोन वर्षे सक्तमजुरी आणि ५०० रुपये दंडाची शिक्षा ठोठावण्यात आली आहे. हा दंड न भरल्यासही एक महिन्याच्या अतिरिक्त सक्त कारावासाची तरतूद करण्यात आली आहे.
पुरावा नष्ट केल्याबद्दल मुख्य आरोपीला स्वतंत्र शिक्षा
मुख्य आरोपी अशोक पाचपुते याला पुरावा नष्ट केल्याप्रकरणी स्वतंत्रपणे दोन वर्षे सक्तमजुरी आणि ५०० रुपये दंड सुनावण्यात आला. दंडाची रक्कम न भरल्यास त्याला एक महिन्याचा अतिरिक्त सक्त कारावास भोगावा लागेल. न्यायालयाच्या आदेशानुसार सुनावण्यात आलेल्या सर्व शिक्षा एकाच वेळी भोगायच्या आहेत.
तपासानंतर न्यायालयात दोषारोपपत्र
पोलीस उपनिरीक्षक संजयकुमार सोने आणि पोलीस उपनिरीक्षक एस. एस. पाटील यांनी गुन्ह्याचा तपास करून न्यायालयात दोषारोपपत्र सादर केले होते. सरकारी पक्षाची बाजू सरकारी वकील के. जी. केसकर यांनी मांडली. न्यायालयीन कामकाजासाठी कोर्ट ऑर्डली म्हणून पोलीस हवालदार एन. आय. नरुटे यांनी सहकार्य केले.
