अहिल्यानगर शहरासह संपूर्ण जिल्ह्यात श्रीराम नवमीचा उत्सव दरवर्षी उत्साहात साजरा केला जातो. यंदाही गुरुवारी सायंकाळी शहरात पारंपरिक पद्धतीने भव्य मिरवणूक काढण्यात येणार असून, विविध हिंदू संघटना आणि रामभक्तांनी यासाठी मोठ्या प्रमाणावर तयारी केली आहे. या पार्श्वभूमीवर कायदा आणि सुव्यवस्था राखण्यासाठी पोलीस प्रशासनाने व्यापक नियोजन केले आहे.
चार प्रमुख मंडळांचा सहभाग, मिरवणुकीची तयारी पूर्ण
मिरवणुकीची सुरुवात छत्रपती शिवाजी महाराजांच्या पुतळ्यापासून होणार असून, शहरातील चार प्रमुख मंडळे या सोहळ्यात सहभागी होणार आहेत. हिंदू राष्ट्र सेना, सकल हिंदू समाज, वास्तव कंपनी आणि श्रीराम सेना बोल्हेगाव या संघटनांकडून मिरवणुकीसाठी सज्जता पूर्ण करण्यात आली आहे. धार्मिक वातावरणात शिस्तबद्ध मिरवणूक पार पाडण्यावर आयोजकांचा भर आहे.
सुरक्षेसाठी तगडा बंदोबस्त आणि तांत्रिक नजर
मिरवणुकीदरम्यान कोणताही अनुचित प्रकार घडू नये, यासाठी पोलीस प्रशासनाने अत्यंत कडक उपाययोजना केल्या आहेत. मिरवणूक मार्गावरील उंच इमारतींवरून पोलिसांची विशेष नजर राहणार असून, दुर्बिणींच्या साहाय्याने संशयास्पद हालचालींवर लक्ष ठेवले जाणार आहे. मार्गावर सर्वत्र बॅरिकेडिंग करण्यात आले असून, वाहतूक व्यवस्थेत तात्पुरते बदल करण्यात येणार आहेत. तसेच ड्रोन कॅमेरे आणि सीसीटीव्ही यंत्रणेद्वारे संपूर्ण परिसरावर सतत देखरेख ठेवली जाणार आहे.
गुन्हेगारी प्रवृत्तीच्या व्यक्तींवर प्रतिबंधात्मक कारवाई
मिरवणुकीच्या पार्श्वभूमीवर संभाव्य अनुशासनभंग टाळण्यासाठी पोलिसांनी प्रतिबंधात्मक कारवाई केली आहे. शहरातील एकूण २१८ गुन्हेगारी प्रवृत्तीच्या व्यक्तींना भारतीय न्याय दंड संहिता कलम १६३ (२) अंतर्गत नोटिसा बजावण्यात आल्या आहेत. यामध्ये तोफखाना पोलीस ठाणे हद्दीतील ९९, कोतवालीतील ७० आणि भिंगार कॅम्पमधील ४९ जणांचा समावेश आहे.
मिरवणूक मार्गावरून पुन्हा वादाची ठिणगी
मिरवणुकीच्या मार्गावरून यंदाही वाद निर्माण झाला आहे. २०१५ मध्ये आशा टॉकीज मार्गे मिरवणूक काढण्यात आली होती, मात्र त्यावेळी तणाव निर्माण होऊन परिस्थिती बिघडली होती. त्यानंतर २०१६ पासून बॉम्बे बेकरी-चांद सुलताना स्कूल मार्ग निश्चित करण्यात आला. यंदा काही संघटनांनी पुन्हा जुन्या मार्गावरून मिरवणूक काढण्याची मागणी केली असली तरी पोलीस प्रशासनाने विद्यमान मार्गावर ठाम भूमिका घेतली आहे.
सुमारे ५०० पोलिसांचा ताफा तैनात
मिरवणुकीसाठी मोठ्या प्रमाणावर पोलीस बंदोबस्त ठेवण्यात आला आहे. पोलीस अधीक्षक सोमनाथ घार्गे आणि अप्पर पोलीस अधीक्षक वैभव कलुबर्मे यांच्या मार्गदर्शनाखाली संपूर्ण सुरक्षा व्यवस्था उभारण्यात आली आहे. दोन उपअधीक्षक, नऊ निरीक्षक, चौदा सहाय्यक व उपनिरीक्षक, ३०० पोलीस कर्मचारी, १०० होमगार्ड, क्यूआरटी पथक आणि एसआरपीएफचे पथक अशा एकूण सुमारे ५०० जवानांची नियुक्ती करण्यात आली आहे. याशिवाय ड्रोन आणि सीसीटीव्हीच्या माध्यमातून सतत देखरेख केली जाणार आहे.
